Totalt 72 elevar stilte til start på skituren frå Beitostølen til Valdres Skisenter i Skrautvål. Sjølv om det berre er pålagt for elevar som tek valfaga friluftsliv eller fysisk aktivitet og helse å delta på skidagane, var det mange friviljuge som ønskte å bli med på heile eller delar av den 50 km lange skituren. Ved Yddin Fjellstue avslutta fleirtalet turen etter matpausen der, men den «harde kjernen» heldt fram mot Skrautvål.
Biletet over er frå matpausen etter 32 km på Juvikåsen.
Dei unge skiløparane hadde god grunn til å vere fornøgde og slitne etter å ha gått både klassisk og skøyting på turen. Ved ankomst Skrautvål litt utpå ettermiddagen 29. mars var det nok mange som sette pris på å kunne slappe av og få litt kvile.
Løypekøyrarane Oddvin Bakkene i Leirin Skiløyper, Jan Ove Bredesen i Yddin og Javnlie løypelag og Knut Aassveen i Beitostølen Løypeforening har alle bidratt til å gjere skidagane til ein suksess. Deira og lærarane ved Øystre Slidre Ungdomsskule sitt engasjement og innsats er avgjerande for å skape ein så bra skitur som mogleg for elevane.
Alt i alt var det ein flott dag med mykje moro og fysisk aktivitet for både lærarar og elevar på Øystre Slidre Ungdomsskule. Det er slike tradisjonar som bidrar til å skape gode minne og gje elevane ei positiv oppleving av friluftsliv og fysisk aktivitet.
